எழுத்தாளர் எஸ் ராமகிருஷ்ணன் நவீன எழுத்துலகின் ஆளுமை

 

எழுத்தாளர் எஸ் ராமகிருஷ்ணன் நவீன எழுத்துலகின் ஆளுமை

எஸ், ராமகிருஷ்ணன் மலேசிய வருகையை முன்னிட்டு இப்பதிவு

 

நவீன தமிழ் எழுத்துலகின் தவிர்க்க முடியாத ஆளுமை எஸ்.ராமகிருஷ்ணன் அவர்கள். இன்றைக்கு இருக்கும் தமிழின் முதன்மை எழுத்தாளர்களில் ஒருவர்.

எஸ்ரா எழுதத்தொடங்கிய 1984 முதல் இன்றுவரை இடைவிடாமல் எழுதிவருகிறார். அவருடைய முதல் படைப்பு ‘பழைய தண்டவாளம்’ என்ற சிறுகதை கனையாழி மாத இதழில் வெளியாகித் தன் படைப்புலக நுழைவை தகவமைத்தார்.

அதற்குப் பின்னர் அவரை வலிமையாக அடையாளம் காட்டிய ‘துணையெழுத்து’ என்ற இலக்கியக் கட்டுரைத் தொடர் ஆனந்த விகடன் வார இதழில் வெளியாகி பரவலான வாசக கவனத்தைப் பெற்றது, கதாவிலாசம், தேசாந்திரி, கேள்விக்குறி ஆகிய கட்டுரைத் தொடர்கள் தொடர்ந்து ஆனந்தவிகடன் இதழ் பிரசுரித்தது .இலக்கிய உலகின் மிகப்பெரிய ஆளுமையாக தன்னை நிறுவிக்கொண்டே இருந்தார்.

கட்டுரைத் தொடர்கள் அவரின் தொடக்க கால எழுத்து வகைக்குச் சான்று என்றாலும், அவர் புனைவெழுத்திலும் தன்னைத் தொடர்ந்து நிரூபித்துக்கொண்டே இருந்தார். நூற்றுக் கணக்கான சிறுகதைகள் இடைவிடாமல் எழுதி வந்தாலும். இலக்கியத்தின் அனைத்து வகைமைகளையும் எழுதிப் பார்க்கிறார். நான் வாசித்த மிகச் சிறந்த நாவல்களின் ‘நெடுங்குருதி’ அவரை என் நினைவில் பதியச் செய்தது. அதனை அடுத்து எஸ்ரா எழுதிய “யாமம்’ நாவல் ஒரு புதிய சமூகத்தின் வாழ்க்கையை அறிமுகம் செய்தது. அத்தர் வாசனைத் திரவியம் செய்து வணிகம் செய்யும் ஒரு சமூகத்தைக் கதைக்களமாகக்கொண்டு எழுதப்பட்ட பெரிய நாவல். அத்தரின் நறுமணத்தைப் போலவே அது நிறைய வாசகர்களைப் போய்ச் சேர்ந்தது. யாமம் நாவலுக்காக 2008ல் தாகூர் இலக்கிய விருதை வென்றார். இது சாகித்திய அக்காடெமிக்கு ஈடான விருது. அவருக்கு மிகுந்த புகழைக் கொடுத்த நாவல், ’சஞ்சாரம்’ இந்நாவலிலும் யாரும் எழுதாத கதைக்களத்தைத் தொட்டுச் செல்கிறார். பலமுறை எழுதித் தேய்வழக்காகிய கதைகள் வாசக மதிப்பைப் பெறுவதில்லை. எனவே அவர் சஞ்சாரம் நாவலில் நாதஸ்வர் கலைஞர்களின் வாழ்க்கைப் பின்னணியை எழுதுகிறார். இந்தியாவில் பல்வேறு பண்பாட்டை கலாச்சாரத்தைப் பின்பற்றும் சமூகங்கள் உள்ளன. இந்தச் சமூக மனிதர்கள் அனைவரும் எழுத்திலக்கியம் சொல்லி முடித்துவிடவில்லை. எனவே எஸ்ரா போன்ற நவீன எழுத்தாளர்கள் இவர்களின் வாழ்க்கையை மையமாகக் கொண்ட கதைகளைச்  சொல்லி இவர்களை வாசிப்புலக் கவனத்துக்குக் கொண்டு வருகிறார்.  இந்திய அரசு வழங்கும் மிகப் புகழ்பெற்ற விருதான சாகித்திய அகாதமி விருதை 2018ல் சஞ்சாரம் வென்றது. 

அபுனைவு, புனைவு எழுத்து வகைகளில் மட்டுமே அவர் கவனம் செலுத்தவில்லை. அவர் இந்தியா முழுதும் பயணம் செய்து அதன் வழியாக தான் சந்தித்த மனிதர்களைப்பற்றியும் ஊர்களைப்பற்றியும் எழுதுகிறார். ஆங்கில பிரஞ்சு ஜப்பான் மொழிகளில் உள்ள புனைவுகளையும் அப்புனவுகளைக் கொடுத்த எழுத்தாளர்களையும் தமிழுக்கு அறிமுகம் செய்கிறார். ருஷ்ய இலக்கியம் அவருக்கு மிக உவப்பானது. ருஷ்ய எழுத்தாளர்களைப் பற்றிய தொடர் இலக்கிய உரை நிகழ்த்தி வாசகர்களை ருஷ்ய இலக்கியப் பக்கம் திருப்பினார். அதைத் தொடர்ந்து அவர்களைப்பற்றிய நூல்களையும் எழுதினார். பாரதி சொன்னதுபோல எட்டுத்திக்கும் உள்ள இலக்கியச் செல்வங்களைத் தமிழுக்குக் கொண்டு வந்து சேர்த்த பெருமையும் அவருக்கு உண்டு.

யு டியூபில் அவருடைய மேடைப் பேச்சுகள் நிறைய  கிடைக்கின்றன. இலக்கிய சார்ந்த அவருடைய உரைகள் ஆழமானவை, அதோடு ஆத்மார்த்தமானவை. அவருடைய வலைத் தளத்திலும் பலவேறுபட்ட இலக்கிய வகைமைகள் நிறைய வாசிக்கக் கிடைக்கின்றன. sramakirishnan.com என்ற வலைத்தள முகவரியில் பிரதி தினமும் எழுதிக்கொண்டே இருக்கிறார். தமிழுக்கு அவையெல்லாம் பெருங்ககொடை. 

 எஸ்ராவின் மிக முக்கிய பதிவான 'சஞ்சாரம்' நாவல் பற்றி பார்ப்போம். 

நாதஸ்வரம் வாசிப்பதை வயிறாதாரமாகக் கொண்ட ஒரு சமூகம் வீழ்ழ்ச்சியுறும் கதை இது. இதனை வாசிக்கும் போது மனம் கனத்தது.

2018 ஆண்டு சாகித்திய அகாடமி விருதுபெற்ற நாவல் இது. சமீபத்தில் சென்னைக்குச் சென்ற போது நாங்கள் அவரைச் சந்திக்க வேண்டுமென்று விரும்பி போனில் தொடர்புகொண்டேன். “என் தேசாந்திரி பதிப்பகத்துக்கு வந்திடுங்க என்று சொல்லி லொக்கேசனை அனுப்பிவைத்தார். எஸ் ரா எனக்கு ஏற்கனவே மலேசிய இலக்கிய நிகழ்ச்சி ஒன்றின் மூலம் பழக்கம் உண்டானது. பின்னர் கடிதத் தொடர்பும் வைத்திருந்தேன். என் கையறு நாவலை வாசித்து தன் பார்வையை அவர் தளத்தில் பதிவிட்டிருந்தார். அந்நாவல் தமிழக வாசகர்களால் வாசிக்கப்பட்டதற்கு அவரின் பதிவும் ஒரு காரணமாக அமைந்தது. அந்த வகையில் எனக்கு அவர் நெருக்கமாகிவிட்டிருந்தார்.

‘சஞ்சாரம்’ நாவல் அவருடைய கையொப்பப் படைப்புகளில் தலையாயது.. நாவல் வடிவில் யாரும் எழுதிராத நாதஸ்வர தவில் கலைஞர்களின் கதையை ‘சஞ்சாரம்’ சொல்லிச் செல்கிறது. அச்சமூகத்தின் இந்த நூற்றாண்டின் வளர்சிதை மாற்றங்களை நேர்த்தியாகக் காட்சிப்படுத்திக்கொண்டே போகிறது நாவல். தற்காலக் கலைஞர்கள் எவ்வாறு நலிந்த, தீண்டத் தகாத சமூகமாகத் தள்ளிவைத்துப் பார்க்கப்பட்டார்கள் என்பதை தன் நுணுக்கமான கதைப்பின்னலால் சிக்கலில்லாமல் விவரித்துக்கொண்டே செல்கிறார் எஸ் ரா. உண்மையிலேயே, பூ வேலைப்பாடு நன்கு தெரிந்த ஒரு பெண்ணின் கலைக் கைகள் நடத்துகின்ற பின்னல் நடனத்தை அழகு குறையாமல் செய்துகாட்டுதுபோல இந்நாவலிலும் அதன் சித்திரத்தை வரைந்து காட்டியிருக்கிறார் எஸ் ரா. முன்னும் பின்னுமாக நடந்த சம்பவங்களை கோர்த்துப் புனையும்போது வாசகனின் ஆர்வத்தை விடாமால் பற்றிக்கொள்கிறது.

ரெத்தினமும் பக்கிரியும் நாவலை நிகழ்த்திச்ச் செல்லும் மையப் பாத்திரங்களாக வருகிறார்கள். ஒரு ஊருக்கு நாதஸ்வரம் வாசிக்க அழைக்கபட்ட இருவரையும் சாதியின் பொருட்டு தரங்குறைவாக நடத்துகிறார்கள். தன் இனத்தை மோசமாக நடத்தும்போதெல்லாம் பக்கிரி எதிர்த்துக் கேட்கிறான். அவருடைய கலகக் குரல் அவர்களுக்கே வினையமாக முடிகிறது. தன் சமூகம் கீழாக மதிக்கப்படும்போதெல்லாம் பக்கிரிய்ன் குரல் உரக்கக் கேட்கிறது. அதனால் பக்கிரியையும் ரெத்தினத்தையும் அடித்து நொறுக்கி அந்த இரவு முழுதும் பட்டினி கிடக்கவைத்து கயிற்றால் கட்டிப்போட்டு விடுகிறார்கள் அவூர்க் காரர்கள். பக்கிரியும் ரெத்தினமும் கோயில் பூசாரியின் உதவியால் அங்கிருந்து தப்பித்து ஓடிவிடுகிறார்கள். தப்பி ஓடுவதற்கு முன்னர் பக்கிரி திருவிழா கூடாரத்திற்கு தீ வைத்துவிடுகிறான். பின்னர் அங்கிருந்து நடந்தே கிளம்பிவிடுகிறார்கள். கதை அந்த முதல் அத்தியாயத்திலேயே சூடு பிடிக்கத் துவங்கி இறுதி அத்தியாயம் வரை அதன் கனப்பு தீராமல் வளர்கிறது.

தாங்கள் வாழ்நாளில் சம்பந்தப்பட்ட ஒவ்வோர் ஊராகச் சுற்றி அலைந்துகொண்டே இருக்கிறார்கள். அதற்கிடையே தீயிடப்பட்ட ஊரில் கலவரம் உண்டாகி போலிஸ் விசாரனைக்கு உட்படுகிறது. போலிஸ் பக்கிரியையும் ரெத்தினத்தையும் வலைபோட்டுத் தேடத் துவங்குகிறது. அவ்வாறு ஒவ்வொரு ஊராக அலையும்போது தங்களுக்கு முன்னர் வாழ்ந்த நாதஸ்வர இசைச் சமூகம் எவ்வாறு சமூக மதிப்போடும் கௌரவத்தோடும் வாழ்ந்தது என்று அவர்கள் தெரிந்துகொள்கிறார்கள். முன்னர் கொடுத்த மரியாதையும் மதிப்பும் ஏன் தற்காலத்தில் தற்காலச் சமூகத்துக்கு நீட்சிகாணவில்லை என்று ஒப்பிட்டு ஏங்குகிறார்கள். நாதஸ்வர் கலைஞர்கள் கொண்டாடப்பட்டதன் காரணமாக கர்வத்தோடு இருந்த நிலை தொழில்நுட்ப வளர்ச்சியாலும். சினிமா வருகையாலும், சினிமாப்பாடல்களின் கவர்ச்சியாலும் இச்சமூக பின்னடைவுக்குக் காரணமாக இருப்பதை சஞ்சாரம் மிக நேர்த்தியாக வரைந்து காட்டுகிறது. தன் இசையால் உலகை மயக்கிய தன்னாசி என்ற நாதஸ்வரக் கலைஞனின் கர்வம் பிறரைத் துன்புறுத்துவதாக இருந்தாலும் அதனை ஒரு பொருட்டாக மதியாத சமூகம் தன்னாசியை கொண்டாடி மகிழ்கிறது. தன்னாசி ஒரு மாபெரும் இசை வல்லுனன் என்பதால் அவரின் கொடுங்குணம் மன்னித்து ஏற்றுக்கொள்ளப்படுவதாக நாவல் ஊடாக சொல்லப்பட்டிருக்கிறது. இசையின் மகத்துவம் இது.

தற்கால நாதஸ்வரக் கலைஞர்களின் நலிந்த நிலையை விலாவாரியாகச் சித்தரிக்கப்பட்டாலும் நாதஸ்வரக் கலையின் மாண்பு குறையாமல் செதுக்கப்பட்ட சித்திரம் ‘சஞ்சாரம்’

All reactions:

11Krishnan Krishnan, Kanagarajan Maruthan and 9 others

எஸ் ராமகிருஷ்ணன் மலேசிய வருகையை  முன்னிட்டு (28.9 2024 சனிக்கிழமை) கூலிம் நவீன இலக்கியக் களம் அவருடனான ஒரு இலக்கியச் சந்திப்பைக் கூலிம், சுங்கைபோப் கெடா, மலைச்சாரல் பிரம்ம வித்யாரண்யத்தில் ஏற்பாடு செய்துள்ளது. மாலை 5.00 முதல்  8.00 வரை நடக்கும் இந்நிகழ்ச்சிக்கு அனைவரையும் அன்புடன் அழைக்கிறோம். மாலைத் தேனீரோடு துவங்கும் இந்நிகழ்ச்சி இரவு உணவோடும் நிறைவுறும். நுழைவு இலவசம். தொடர்புக்கு 0195584905 கோ.புண்ணியவான்.013 4315359 குமாரசாமி.