ஹோர்ஜ்டவுன் ஆனைத்துல இலக்கிய விழாவும் கரிகாற்சோழன் விருதும்.

6. ஜோர்ஜ்டவுன் ஆனைத்துல இலக்கிய விழாவும் கரிகாற்சோழன் விருதும்.

    நான் நீண்ட படைப்பிலக்கியம் எழுதுவதில் விருப்பம் இல்லாதவன். என் விருப்பம் அதுவாக இருந்தாலும், நான் ஒன்றைக் கூர்ந்து கவனிக்கிறேன் தொடங்கிவிட்டால் படைப்பு நம்மைத் தொடர்ந்து எழுத அறைகூவல் விடுத்துக்கொண்டே இருக்கும். அதுதான் கலையின் மகத்துவம்.தொடங்கியவுடனே நம் சிந்தனை முன்னோக்கிப் பாய்ந்துகொண்டே இருக்கிறது.இவ்வளவு அனுபவங்களா என்றே நாம் பிரமிக்கிறோம். நாம் கடந்துவந்த உப்புக்குதவாத செய்லகள்கூட அழகியலால் கவித்துவத்தால் அவை வாசிக்கத் தகுந்த சுவாரஸ்யத்தை தனக்குள்ளே புதைத்துவைத்துக்கொண்டு எழுதும்போது இன்னும் சீற்றத்தோடு வெளிப்பட்டுவிடுகின்றன. இயல்பாகவே கடிவாளம் இழுக்கப்பட்டவுடன் முன்னோக்கிப் பாயும் மனித சிந்தனை, படைப்பாற்றலின் வெளிப்பாடு, அதற்கு ஈடாக இயங்கும் மொழி நீண்ட படைப்புக்கு வழி வகுத்துவிடுகிறது. எனக்கு நாவல் எழுத வராது என்று என் நண்பர் சொன்னவுடன் நான் இதைத்தான் சொன்னேன். முதல் அத்தியாயத்தை எழுதிவிடுங்கள் பின்னர் அதுவாகவே இழுத்துவைத்துக்கொண்டு முன்னோக்கி செல்ல உந்தும் என்று. கலை மனிதனுக்குக் கொடுப்பது பரவசம் மட்டுமல்ல தன்னூக்கமும்ந்தான்.

விக்கோரியா கார்டன் விடுதி அறையின் குளிர்மை தூய்மை தனிமை என்னைக் கலைப்பு தீரத் தூங்கி எழ வைத்திருந்தது. விடுதி  வழங்கப்படும் காலை உணவு இந்நேரம் இருக்குமா/ கழுவி மூடியிருப்பார்களா என்ற சந்தேகம் வந்துவிட்டது. நல்ல வேளையாக நான் கடைசி ஆளாக போய் நின்றேன். நாசி லெமாவுக்கான கறி முடிந்து அதனை மௌசில்லாமல் ஆக்கிவிட்டிருந்தது. ரெண்டு ரொட்டித் துண்டை விழுங்கிவிட்டு யு ஏ பி கட்டட மேல் மாடிக்கு ஓடினேன். அந்த வளாகம் பட்டணத்துக்கே உரிய பரபரப்பு குறைந்திருந்தது. அது உயர்தர மக்கள் புழங்கும் இடம். அந்த வர்க்க மக்கள் எண்ணிக்கையில் குறைவானவர்கள்தானே. ஆனாலும் எல்லாத் துறையைலும் ஆக்ரமிப்பும் அதிகாரமும் கொண்டவர்கள் அந்தச் சிறுபான்மையினர்தான். 

நிகழ்ச்சிக்கு வருகிறேன், ஜெயமோகனைப் பார்க்கவேண்டும் என்று ஆவலுடன் இருந்தார். அவருடைய அறம், புறப்பாடு நூல்களை வாசித்துவிட்டு அவரோடு ஒரு படம் எடுத்துக்கொள்ள வேண்டும் என்றார். செபெஸ்டியனின் மனைவி வெளியே நின்றிருந்தார். செபெஸ்டியன் காரை நிறுத்திவிட்டு வருவதாகச் சொன்னார். நான் நிகழ்ச்சி நடக்கும் இடத்தைக் காட்டிவிட்டு படிகளில் ஏறி ஓடினேன்.

நவீனும் லதாவும் நிகழ்ச்சியை ஒருங்கிணைத்துக் கொண்டிருந்தனர். ஜெயமோகன் ஆங்கிலத்தில் பதிலுரைத்துக்கொண்டிருந்தார். எனக்கு ஆங்கிலம் வராது என்றே ஒருமுறை தன் வலைத்தளத்தில் எழுதியவர் இப்படி பொளந்து கட்டுகிறாரே என்று வியந்தேன், நிறைய அனைத்துல இலக்கிய அரங்கில் கலந்து கொண்டமையால் இந்த ஆங்கிலம் பேசும் ஆற்றல் கைகூடிவிட்டது அவருக்கு. அந்த அரங்கு பிற மொழி பேசும் வாசகர்களாலும் நிறைந்திருந்ததால் ஆங்கலத்திலும் பேச வேண்டியதாயிற்று.

அவர் சொன்ன ஒரு சவாலான வாக்கியம் 'நான் பிராண்ஸ் காப்காபோல வரவேண்டும்; என்பதே. சவடால் பேசும் முகநூல் போராளிகளுக்கு இச்செய்தி போய்ச் சேரவில்லை போலும். என்னைப் பொருத்தவரை அவர் படைப்புகள் ஆங்கிலத்தில் மொழிபெயர்க்கப்பட்டு பரவலான வாசிப்புக்குப் போயிருந்தால் இந்நேரம் அவர் அனைத்துலக ஆளுமைகளில் யாரோவாகவோ இருந்திருப்பார். தமிழுக்கு உண்டான சோதனை மொழிபெயர்ப்பு இன்னும் சரியாகக் கைகூடவில்லை. சமீபத்தில் ஆங்கில மொழிபெயர்ப்பில் வந்திருக்கும் வெள்ளை யானை நாவல் ,  வந்த வேகத்திலெயே அமெரிக்காவில் அனைத்துலக புத்தகப் பரிசை வென்றிருக்கிறது.https://www.jeyamohan.in/175931/

சுதந்திரன் ஜெயமோகன்

அவருடைய நிகழ்ச்சியை முடித்துக்கொண்டு நான் விடுதிக்கு ஓடினேன்.இரண்டுக்கெல்லாம் பினாங்கு விமான நிலையத்தில் இருக்கவேண்டும். என் மகனோடு தொடர்புகொண்டு என்னை விமான நிலையத்தில் இறக்கிவிடுமாறு முன்னமேயே சொல்லியிருந்தேன். நான் திருச்சிக்குப் போவதால் 2 மணி நேரத்துக்கு முன்னாலேயெ பினாங்கு விமான நிலையத்தில் இருந்தாக வேண்டும். 

இடையில்' டச் அண்ட் கோ' கார்டில் பணம் முடிந்துவிட்டமையால் வெளியேறும் வாசல் தடுப்பு திறக்காமல் முரண்டு பண்ணியது.காரை ஒரு ஓரத்தில் நிறுத்திவிட்டு விடுதியின் வரவேற்பறைக்கு ஓடினேன். உங்களுக்கு பார்க்கிங் கூட இலவசம் என்று என் அட்டையிலிருந்து கழிக்கப்பட்ட தொகையை மீண்டும் நிரப்பிக் கொடுத்தாள் வரவேற்பு அலுவலர். நான் அது தெரியாமல் விழித்திருக்கிறேன். ஜோர்ஜ் டௌன் இலக்கிய குழு இப்படி எந்தக் குறையில்லாமல் படைப்பாளர்களைக் கவனித்துக்கொண்டது. 

ஆனால் தமிழைப் பொறுத்தவரை ஒரு நல்ல படைப்பாளனை முடிந்தமட்டும் மூடியே வைக்கப்பார்க்கிறது. ஒரு அரசியல் வாதிக்குத் தரும் போலி விளம்பரத்தை போலி கௌரவத்தைக்கூட படைப்பாளனுக்குக் கொடுப்பதில்லை. இது சமூகச் சாபக்கேடு. படைப்பாளனேதான் தன் படைப்பு முயற்சியால் சமூகத்தைத் திரும்பிப்பார்க்க வைக்க வேண்டும். ஒருவகையில் இதுவும் நல்லதுதான் . தொடர்ந்து படைப்புச் செயல்பாட்டில் அவன் தன்னை ஈடுபடுத்திக்கொண்டே இருக்க இதுவும் ஒரு நல்ல யுக்திதான்.

விமான நிலையத்திலிருந்து கவிஞர் ஏ எஸ் ப்ராண்சிஸை தொடர்புகொண்டு திருச்சியில் தங்கும் வசதி பற்றி உறுதிசெய்துகொண்டேன். பிராண்சிஸ் 2018ஆம் ஆண்டுக்கான கரிகாற்சோழன் விருதுபெற முன்னமேயே போய்விட்டிருந்தார். கோவிட் அசுரப்பரவல் காரணமாக விருது நிகழ்ச்சிகள் தள்ளிப்போடப்பட்டு  28.11.22ல்தான் சாத்தியமானது.

பினாங்கிலிருந்து கோலால்ம்பூர் போய் அங்கிருந்து திருச்சிக்கு இரவு 8.15 மீண்டும் பயணம்.திருச்சியை இரவு 9.45 அடைந்ததும் ஒரு டேக்சியில் விடுதிக்குப் போவதாய்த் திட்டம். மறுநாள் அங்கிருந்து தஞ்சை தமிழ்ப் பல்கலைக்குச் ஒன்றாய்ச் செல்லலாம் என்று முடிவெடுக்கப்பட்டிருந்தது.. அதற்கிடையில் மலேசிய எழுத்தாளர் சங்கத் தலைவர் சைமன் அதே ஓட்டலுக்கு சற்றுத் தாமத்தித்து வந்த சேர்வதாக பிராண்சிஸ் சொன்னார். அவரோடு அன்பழகன் என்ற எழுத்தாளரும் ( 2019 ஆண்டுக்கான கரிகாற்சோழன் விருது பெறுபவர்) வருவதாகச் சொன்னார். எனவே நால்வரும் ஒரு வாடகைக்காரில் தஞ்சைக்குப் போய்விடலாம் என்று சொன்னார் பிராண்சிஸ். 

350 ரூபாய்க்கு ஒரு டேகிசியைப் பிடித்து, நான் பிரான்ஸிஸ் தங்கும் அறைக்குப் போனபோது அவர் போர்வைக்குள் இருந்தார்.கதவைத் திறந்தே வைத்திருந்தார். ஆனால் என் நுழைவு அவரை எழுப்பிவிட்டிருந்தது.

விடுதியின் விலை மிக அதிகம். அதற்குள் சைமனும் அன்பழகனும் வந்து சேர்ந்திருந்தனர். சைமன் பைகளை வைத்துவிட்டு உடனே இறங்கிப் போனார். 'இங்க வந்தா பால் சாப்பிடனும்ல ' என்றார். என்ன பால் என்று நான் விழிக்க..வாங்க என்றார்.

விடுதியின் கீழே சாலை பரபரப்பாக இருந்தது. இரவில் விற்கும் பாதாம் பாலுக்கு வரிசை கட்டி நின்றார்கள். ஆவி பிரியும் பால் (தப்பாக எடுத்துக்கொள்ள வேண்டாம் பாலுக்குக்கூட ஆவி பிரியுமா என்று) .  விற்கப்பட்டுக்கொண்டிருந்தது. பலவகை அங்காடிக் கடைகளும் இருந்தன. ஆனால் பாதாம் கடையில்தான் கூட்டம் மொய்த்துக்கொண்டிருந்தது. எனக்கு ஒந்று வாங்கி வந்தார்கள். பாலில் இனிப்பு அதிகமாக இருக்கும் என்பதால் வேண்டாம் என்றேன். ஆனால் நா தட்டிக்கொண்டே இருந்தது.

இணையுங்கள்....